აურა - ქართველი თინეიჯერის ახალი კოსმეტიკური ბრენდი
უსაფრთხო, ვეგანური და ორგანული კოსმეტიკური საშუალებები ასეთია არასრულწლოვანი თინეიჯერის ბიზნეს წამოწყება. ახალი ბრენდი "აურა" მომხმარებელს ტუჩის, სახის და ტანის სკრაბებს, ტუჩსაცხებს, სურნელოვან ზეთებს, თვალის მინერალაურ ჩრდილს და კიდევ რამდენიმე დასახელების პროდუქტს სთავაზობს.
პროდუქციას ნიაკო ხეჩიკაშვილი თავად ამზადებს. საქმიანობა პანდემიის პერიოდში, ზაფხულში, საკუთარი დანაზოგით დაიწყო. მცირე ბიზნეს კურსი კარიერული განვითარების ცენტრში გაიარა, ონლაინ ესწრება ვებინარებს და ვორქშოფებს - კოსმეტოლოგიის მიმართულებითაც და პარალელურად სწავლის საზღვარგარეთ გასაგრძელებლად ემზადება.
"ვერც კი წარმოვიდგენდი, თუ ჩემს პროდუქტებს ასეთი გამოხმაურება მოჰყვებოდა, ყოველდღიურად მაკვირვებს მოთხოვნის რაოდენობაც და მომხმარებლის დამოკიდებულებაც. ვეგანი ვარ და ამიტომ გადავწყვიტე ამ მიმართულებით შემექმნა თავის მოვლის საშუალებები. პროდუქციის შეძენა ამ დროისთვის მხოლოდ ონლაინ არის შესაძლებელი. მომწონს, როდესაც ხარისხზე აღნიშნავენ და ამბობენ, რომ ფასთან მიმართებით გაცილებით მაღალია" - განმარტავს "ბიზნესპარტნიორთან" „აურას“ დამფუძნებელი ნიაკო ხეჩიკაშვილი
ნედლეული ნაწილობრივ ადგილობრივი, ნაწილობრივ კი იმპორტირებულია. ფასები მასობროვ მოხმარებაზეა გათვლილი. სამომავლოდ „აურა“ ასორტიმენტის გამრავალფეროვნებას გეგმავს.
"თებერვლიდან უკვე ახალ პროდუქტებს გამოვიტანთ, ეს იქნება განსხვავებული ფორმულის ტუჩსაცხი, წარბის და წამწამის მოვლის ნაკრები, გარკვეული პერიოდის შემდეგ კი, ჩემზე უფრო გამოცდილ და კომპეტენტურ ადამიანთან ერთად, აკნეს საწინააღმდეგო საშუალებების შექმნასაც ვფიქრობ. ბიზნესის და კოსმეტოლოგიის ცოდნას კიდევ უფრო გავიღრმავებ, გავაერთიანებ და ბევრ საინტერესო პროდუქტს შევთავაზებ ქართველ მომხმარებელს,“ - ამბობს ნიაკო ხეჩიკაშვილი.
ბრენდი „აურა“ ბაზარზე 2020 წლის ივლისის თვიდანაა წარმოდგენილი.
