COVID-ი კიდევ დიდხანს იქნება, ქართველმა ხალხმა ეს უნდა გამოიყენოს - “გლენბერი“
მსოფლიოში ბოსტნეულით მომმარაგებელი ჩინეთი იყო. დღეს კი კორონავირუსმა ხელი შეუწყო საქართველოს და მის მსგავსს ქვეყნებს, საერთაშორისო ბაზარზე ჩინეთი ჩაანაცვლოს, - აცხადებს "ბიზნესპარტნიორთან" "გლინბერის" ხელმძღვანელი რაფაელ მაღალაშვილი.
მისი თქმით, საქართველომ უნდა შეძლოს ხარისხიანი ბოსტნეულის იმ რაოდენობით წარმოება, რომ მისი რეალიზება თავისუფლად მოხდეს აშშ-ში, ისარელსა და ევროპის სხვადასხვა ქვეყანაში.
მისი განცხადებით, კორონავირუსი საქართველოსთვის უნდა იყოს მამოძარავებელი ძალა. ეს ვირუსი მსოფლიოში დიდხანს იქნება და ქართველმა ხალხმა ეს უნდა გამოიყენოს.
„მაგალითად, გორში მოდის დიდი რაოდენობით პომიდორი, რომლის ფასი 1 კილოგრამზე 0.34-0.40 ლარია. ასეთი დაბალი ფასი მსოფლიოში არსად არის. ჩვენთან ამხელა შრომა არ ფასდება. საერთაშორისო ბაზარზე 1 კილოგრამი პომიდორი 2 აშშ დოლარად იყიდება. ხომ შეიძლება თუნდაც გორში აშენდეს ქარხანა, სადაც ბოსტნეულს ჩაიბარებენ, გადაამუშავებენ და ექსპორტზე გაიტანენ. საკმაოდ სარფიანი საქმეა, 1 კილოგრამში 2.5 დოლარს იხდიან. მე ვერ ვაკეთებ, რადგან ამის ფინანსები არ მაქვს,“ - აცხადებს რაფაელ მაღალაშვილი.
გაყინული ხილ-ბოსტნეულის გადამამუშავებელი და შემნახველი საწარმო „გლენბერი” 2018 წელს გაიხსნა. კომპანიამ საწყის ეტაპზე 9 მილიონი ლარის ინვესტიცია განახორციელა. კომპანია შიდა ქართლში, ქარელში მდებარეობს, საწარმოში 250 კაცია დასაქმებული.
