დაბადების დღე შინაური ცხოველებისთვის - რას სთავაზობს Misho’s Pet Café ოთხფეხა მეგობრებს
Misho’s Pet Café მომხმარებლებისთვის პერიოდულად სხვადასხვა ღონისძიების ჩატარებას გეგმავს.
როგორც კაფის დამფუძნებელი, მაკა ბაიდოშვილი „ბიზნესპარტნიორთან“ ამბობს, Misho’s Pet Café-ში სამომავლოდ შინაური ცხოველების დაბადების დღეების გადახდა იქნება შესაძლებელი. ამ მიმართულებით, კაფე მომხმარებლებს სპეციალურ პაკეტებს შესთავაზებს.
ამას გარდა, იგეგმება ოთხფეხა მეგობრების ქცევის კორექტირებასა და სხვა თემებზე სემინარების ჩატარებაც, რომელსაც მოწვეული კინოლოგი გაუძღვება.
ახლო მომავალში სემინარებს ჩაატარებს ვეტერინარიც, რომელიც მომხმარებლისთვის აქტუალურ და საინტერესო თემებზე დასმულ კითხვებს უპასუხებს.
შეგახსენებთ, რომ საქართველოში პირველი შინაურ ცხოველთა კაფე 1 თვეა გაიხსნა. ეს სივრცე მომხმარებლებისთვის ერთდროულად რამდენიმე შეთავაზებას აერთიანებს. კაფეში მოწყობილია მაღაზიის კუთხეც, სადაც მსურველებს შინაური ცხოველებისთვის ტანსაცმლის, ავეჯისა თუ აქსესუარების შეძენა შეუძლიათ. ამასთან, კაფე სტუმრებს სპეციალურად ოთხფეხა მეგობრებისთვის შექმნილ ორცხობილებსაც სთავაზობს.
