ფიტნესდარბაზები რეგულაციების საბოლოო ვერსიის მოლოდინში არიან
ფიტნესდარბაზები კორონავირუსის გავრცელების პრევენციის მიზნით დარგისთვის შემუშავებული რეგულაციების საბოლოო ვერსიას ელოდებიან. რეგულაციების ნაწილზე მხარეები უკვე შეთანხმდნენ, გარკვეულ საკითხებში დარგის წარმომადგენლებმა კორექტივები შეიტანეს და ის ეპიდემიოლოგებთან შეთახმდება.
როგორც "ოქტოპუს ფიტნეს" კლუბის დამფუძნებელმა „ბიზნესპარტნიორთან“ აღნიშნა, რამდენიმე მნიშვნელოვან საკითხზე მხარეებს შორის შეთანხმება მიღწეულია. კერძოდ, მართალია კლიენტებს სპორტ დარბაზებში პირბადით მოუწევთ შესვლა, თუმცა ვარჯიშის დროს პირბადის გამოყენება სავალდებულო არ იქნება.
ამასთან, მომხმარებლები გასახდელებითა და საშხაპეებით სარგებლობასაც შეძლებენ. ლოქერები კი ერთის გამოტოვებით დაალუქული იქნება.
გიორგი ასათიანის თქმით, ყველა სტანდარტული რეგულაცია, როგორებიცაა მაგალითად თერმოსკრინინგი, დეზობარიერების განთავსება და სანიტარული წესები ძალაში რჩება. ამასთან, ტრენაჟორები სოციალური დისტანციით განთავსება ან ერთმანეთისგან ბარიერებით გამოიყოფა.
რაც შეეხება დარგის წარმომადგენლების მიერ რეგულაციებში შეტანილ კორექტივებს, ისინი ფიტნეს კლუბებში დასაშვებ ადამიანთა რაოდენობის გაზრდას ითხოვენ. კერძოდ, თუ რეგულაციები 8 კვ მეტრზე 1 ადამიანის დაშვებას ითვალისწნებდა, ფიტნეს კლუბები კონკრეტული ფართის მოცულობის შემცირებას ითხოვენ. ამ საკითხთან დაკავშირებთ დაგეგმილია ეპიდემიოლოგებთან კონსულტაციები.
„ჩვენ უკვე დაახლოებით 3 თვეზე მეტია, რაც დაკეტილები ვართ. ამ პერიოდის განმავლობაში შრომის ინსპექტირების და ბიზნეს ომბუდსმენისთვის გვქონდა მიწოდებული ჩვენი რეკომენდაციები და იდეები თუ რა კუთხით შეიძლება იყოს გახსნილი ფიტნეს კლუბები, რომელთა ძალიან დიდი ნაწილი გაითვალისწინეს, შეათანხმეს ეპიდემიოლოგებთან და რეალურად გუშინდელი შეხვედრა ამის გაცნობას ემსახურებოდა. დარჩენილი იყო რამოდეიმე საკითხი, რომელთა დაზუსტებაც მოხდება უახლოეს დღეებში და სავარაუდოდ უახლოეს პერიოდში მოგვეცემა სამუშაოს გაგრძელების საშუალება.“ – განუცხადა „ბიზნესპარტნიორს“ გიორგი ასათიანმა.
შეგახსენებთ, რომ ფიტნესდარბაზის, ღია და დახურული აუზის წარმომადგენლებმა საქართველოს ბიზნესომბუდსმენსა და შრომის მთავარ ინსპექტორთან გუშინ გამართულ შეხვედრაზე იმსჯელეს და რეგულაციების სამუშაო ვერსია განიხილეს.
ფოტო: ოკტოპუს ფიტნეს კლუბი
