Gtex Group: კონსულტანტები მიდიან როგორც სამსახურიდან, ისე ქვეყნიდან
ტანსაცმლის, აქსესუარებისა და ავეჯის ცნობილი ბრენდების შემომყვანი კომპანია Gtex Group-ის ხელმძღვანელი კადრების დეფიციტზე „ბიზნესპარტნიორთან“ საუბრობს.
მისი განცხადებით, განსაკუთრებით მწვავედ დგას Gtex-ის მიერ წარმოდგენილ ბრენდულ მაღაზიებში (OVS, Terranova, Penti, English Home, Enza Home, Mattalan) კონსულტანტების პრობლემა, რომლებიც მიდიან როგორც სამსახურიდან, ისე ქვეყნიდან.
„თითქმის 1 წელი ხდება ეს პროცესი მიდის. ქვეყნიდან ხალხის დენადობაა,ამიტომ ანალოგიური პრობლემა ბიზნესის თითქმის ყველა სექტორს აქვს,“-აცხადებს ბასილაძე.
კითხვაზე, რამდენია დღეს კომპანიის ბრენდულ მაღაზიებში დასაქმებული კონსულტანტების საშუალო ხელფასი და რას აკეთებს მენეჯმენტი კადრის შესანარჩუნებლად, ბასილაძე განმარტავს, რომ Gtex-ის ადმინისტრაციამ სამოტივაციო პაკეტებში ცვლილებები განახორციელა, მათ შორის კი ხელფასის დაახლოებით 20%-იანი ზრდა იყო.
საშუალო ხელფასის ოდენობას ბასილაძე არ ასახელებს.
Gtex Group-ის ხელმძღვანელი აცხადებს, რომ არ არის გამორიცხული კომპანიამ მიგრანტები დაასაქმოს. „ჩვენ არ გვაქვს პრობლემა არც კანის ფერზე და არც მოქალაქე იქნება თუ არამოქალაქე, ჯერჯერობით ასეთი პრეცენდენტი არ გვქონია,“-აცხადებს ბასილაძე.
კომპანია Gtex-ი საქართველოს ბაზარზე 2007 წლიდან ოპერირებს. პირველი ბრენდი, რომელიც კომპანიამ საქართველოში შემოიყვანა Collezione იყო. ამჟამად, Gtex-ი წარმოდგენილია ბრენდებით: OVS, Terranova, Penti, English Home, Enza Home, Mattalan-ი. კომპანიას საქართველოს მასშტაბით 30-ზე მეტი ობიექტი აქვს.
