ხის ხელნაკეთი სათამაშოების სოციალური საწარმო "დადარი" საექსპორტო ბაზრებზე გააქტიურებას გეგმავს
მაღალხარისხიანი ხის ხელნაკეთი სათამაშოების მწარმოებელი სოციალური საწარმო "დადარი" ექსპორტის მიმართულების გაფართოებას გეგმავს.
როგორც საწარმოს მენეჯერმა, თეონა გეთიაშვილმა "ბიზნესპარტნიორთან" განაცხადა, საწარმო ექსპორტის მოცულობის გაზრდას გეგმავს გერმანიაში, ამავდროულად კი მიმდინარეობს მოლაპარაკებები სხვა ევროპულ ბაზრებთანაც.
თეონა გეთიაშვილის განმარტებით, ეკოლოგიურად სუფთა ქართულ ნაწარმზე მოთხოვნა ადგილობრივ ბაზარზეც მზარდია, თუმცა არსებობს გამოწვევები.
„მართალია ეკოლოგიურად სუფთა სათამაშოებზე ადგილობრივ ბაზარზეც მოთხოვნა არ არის მასთაბური, მაგრამ მოთხოვნა მზარდია და ეს მნიშვნელოვანია. გვესაჭიროება მხარდაჭერა, რომ რაც შეიძლება ბევრმა ადამიანმა გაიცნოს და გაიგოს ქართული წარმოების შესახებ,“ - ამბობს თეონა გეთიაშვილი.
სოციალური საწარმო "დადარი" ქართულ ბაზარზე 2018 წლიდან ოპერირებს. კომპანია აწარმოებს ხის, ნატურალურ სათამაშოებს, რომლებიც დამუშავებულია ასევე ნატურალური საღებავებით. საწარმოში დასაქმებული არიან სპეციალური საჭიროებების მქონე და იძულებით გადაადგილებული პირები.
