PODIUM: არც სალონს დავხურავ, არც ჯარიმას გადავიხდი - დახურვა გაკოტრებას ნიშნავს
სილამაზის სალონი „პოდიუმის“ ხელმძღვანელი ნელი ავილოვი აცხადებს, რომ მთავრობის მიერ სილამაზის სალონების დახურვის გადაწყვეტილება მისი ბიზნესისთვის გაკოტრების ტოლფასი იქნება. მისი სამივე ფილიალი მოლში (2-სითი მოლში, 1-გალერია თბილისში) მდებარეობს, სადაც მაქსიმალურადაა დაცული ყველა ნორმა, მათ შორის 2 მეტრიანი დისტანცია და ასე შემდეგ.
„მეტრო დაკეტონ, ავტობუსები შეზღუდონ. ვისაც ჰყავს საკუთარი მანქანა ან ტაქსის საშუალება აქვს ივლის ის სალონში, თუ არ აქვს, ხალხი ტყუილად არ მოვა. მოლში ჯამურად დადის იმდენი ხალხი, რაც ორ ავტობუსში დგას და ერთ მეტროს ვაგონში. გააჩერონ ის და ჩვენ ვიზრუნებთ ჩვენივე თანამშრომლებზე, მოვიყვანთ სამსახურში ტაქსით თუ მანქანით ამას არ აქვს მნიშვნელობა, ვისაც სჭირდება ის მოვა,“ - აცხადებს ნელი ავილოვი.
მისი ინფორმაციით, სილამაზის სალონს გასულ წელთან შედარებით შემოსავლები ისედაც მკვეთრად, დაახლოებით 70%-ით შეუმცირდა, დახურვა კი მათ სუნთქვის საშუალებას მოუსპობს.
„რომ დავიხურო, მუშაობას ვეღარ განვაახლებ, ამიტომ სალონს არ დავხურავ. არც ჯარიმას გადავიხდი, მილიონი ადამიანი დააჯარიმეს და მაქედან არავის გადაუხდია ეს თანხა, მეც მასე ვიმუშავებ. სალონები რომ დაიხუროს, ყველა თავის სტილისტთან სახლში ივლის, რა მნიშვნელობა აქვს სახლში ივლიან თუ მე ვიმუშავებ და გავაგრძელებ ჩემს ბიზნესს, რომელიც 20 წელი ვაშენე. ყველას იჯარის დავალიანება გვაქვს, გადასახდელია ბანკის სესხები. რა მომკლავს მე და ჩემს 100 თანამშრომელს, კორონავირუსი თუ უმუშევრობა აღარ ვიცი,“ - აცხადებს ნელი ავილოვი.
მისი ინფორმაციით, მთავრობისგან სალონს ამ დრომდე არანაირი ოფიციალური შეტყობინება დახურვასთან დაკავშირებით არ მიუღია.
შეგახსენებთ, გუშინ საღამოს გავრცელებული ინფორმაციით ქვეყანაში ეპიდემიოლოგიური მდგომარეობის დამძიმების გამო შესაძლოა დაიხუროს როგორც დიდი სავაჭრო ქსელები (მოლები), ასევე სალონები. საუბარია, საქალაქთაშორისო ტრანსპორტის შეზღუდვაზეც.
