რა ეტაპზეა ბათუმის აეროპორტის გაფართოების სამუშაოები
ბათუმის საერთაშორისო აეროპორტის გაფართოების სამუშაოები გრძელდება. როგორც თბილისისა და ბათუმის საერთაშორისო აეროპორტების ოპერატორ კომპანია TAV Georgia-ს ცნობით, მოფრენის ზონაში უკვე დასრულდა კარკასული სამუშაოები.
ამ ეტაპზე მიმდინარეობს შიდა ტიხრებისა და ფასადის მოპირკეთების სამუშაოები.
კომპანიაში ამბობენ, რომ დასრულებულია საბარგო ზონის გაფართოების სამუშაოები და დაწყებულია ავტომატური კონვეერული სისტემის მონტაჟის პროცესი; გაფრენის ზონაში დასრულდა საძირკვლის და კოლონების მოწყობის სამუშაოები, მიმდინარეობს გადახურვის მოწყობის სამუშაოები; ასევე მიმდინარეობს სახანძრო უსაფრთხოების ახალი სისტემების მოსაწყობად საკომუნიკაციო ქსელების განახლება.
TAV Georgia-ს გაცხადებული გეგმით, აეროპორტში ინფრასტრუქტურული სამუშაოები 2021 წლის თებერვლისთვის უნდა დასრულდეს. შესაბამისად, 2021 წლიდან ბათუმის აეროპორტი წელიწადში 1 200 000 მგზავრს მოემსახურება. აეროპორტი 2019 წელს 600 000 მგზავრს მოემსახურა.
გაფართოების პროექტის საერთო საინვესტიციო ღირებულება 17 მლნ დოლარია.
