შესაფუთი მასალების მწარმოებლები ევროკავშირში ექსპორტს იწყებენ
საქართველოში წარმოებული შესაფუთი მასალების ექსპორტი იზრდება. როგორც „ბიზნესპარტნიორს“ “შესაფუთი მასალების კლასტერის“ თანადამფუძნებელმა სალომე ქარელმა განუცხადა, ძირითადი საექსპორტო ბაზრები სომხეთი და აზერბაიჯანია, თუმცა, მზარდია მოთხოვნა ევროპის ქვეყნებშიც.
„გასულ წელს ვიყავით გამოფენაზე ევროკავშირში და ნახეს მსხვილმა იმპორტიორმა კომპანიებმა, რომ საქართველოში წარმოებული შეფუთვები ევროკავშირში წარმოებულს არ ჩამოუვარდება და ევროკავშირის მოთოვნებს აკმაყოფილებს.
ამიტომ, საქართველო შეიძლება იყოს კონკურენტუნარიანი სხვა ევროპული ქვეყნების შეფუთვების მწარმოებლებთან. ძირითადად, მოთხოვნა არის ისეთ ნედლეულზე, რომელიც უსაფრთხოა როგორც ადამიანის ჯანმრთელობისთვის, ასევე გარემოსთვის. ევროკავშირში საკმაოდ მკაცრი სტანდარტი აქვთ, რისი შესრულებაც საკმაოდ ძვირია და ეძებენ ალტენატიულ შეფუთვებს, რაც უფრო მრავალჯერადი გამოყნების შეფუთვების მოძიებას უკავშირდება. საქართველოს ამ კუთხით შეუძლია საკუთარი პროდუქციის გატანა. ასევე, აქვს შესაძლებლობა ლოგისტიკურ ჯაჭვში არსებული ცვლილებებითაც ისარგებლოს და ევროპაში საკუთარი პროდუქციის ექსპორტი დაიწყოს“- აცხადებს სალომე ქარელი.
მისი განმარტებით, მას შემდეგ რაც ქართველ მწარმოებლებს ჩინეთიდან ნედლეულის ტრანსპორტირება გაურთულდათ, თურქეთის ბაზარზე გადაერთნენ, სადაც ნედლეული შედარებით უფრო ძვირია, მაგრამ უფრო ხარისხიანიც. შესაბამისად, ეს სექტორი ერთ-ერთი პირველია, რომელიც დიაგონალური კუმულაციით სარგებლობს და თურქეთიდან შემოტანილი ნედლეულით დამზადებული პროდუქტის ექსპორტზე გატანას იწყებს.
