თბილისში Hilton-ის ბრენდის პირველი სასტუმროს გახსნა პანდემიის დასრულებაზეა დამოკიდებული
თბილისში Hilton-ის ბრენდის პირველი სასტუმროს გახსნა პანდემიის დასრულებაზეა დამოკიდებული. პროექტი ბიზნესმენ ლაშა პაპაშვილის კომპანია „რედიქს ჯგუფს“ ეკუთვნის.
როგორც ბიზნესმენი „ბიზნესპარტნიორთან“ აცხადებს, სასტუმროს მშენებლობა დასრულებულია, თუმცა მის გახსნას, სანამ ტურისტები არ იქნებიან, აზრი არ აქვს.
სასტუმროს გახსნის თარიღი რამდენჯერმე შეიცვალა. Hilton-ის პირველი სასტუმრო დედაქალაქში ჯერ 2020 წლის თებერვალში, შემდეგ კი მარტში უნდა გახსნილიყო.
Hilton Garden inn.-ს ბიზნესმენი ლაშა პაპაშვილი EBRD-ის თანადაფინანსებით ჭავჭავაძის გამზირზე ააშენა. პროექტის საინვესტიციო ღირებულება 31 მლნ დოლარია. 14-სართულიანი სასტუმროს მშენებლობა, სადაც 165 ნომერი იქნება განთავსებული, საშუალო სეგმენტსა და ბიზნეს მოგზაურებზე იქნება გათვლილი.
Hilton-ის ბრენდის ქვეშ სასტუმრო უკვე ფუნქციონირებს ბათუმში, რომელიც 2015 წელს გაიხსნა. Hilton-ის ბრენდის მეორე სასტუმრო თბილისში, სოფლის მეურნეობის სასტუმროს ყოფილ შენობაში გაიხსნება. ამავე ბრენდის ქვეშ სასტუმროს მშენებლობას გეგმავს თბილისში, მელიქიშვილის გამზირზე ბიზნესმენი დავით კოდუა.
