ვერცხლის აქსესუარების ბრენდი KENE პანდემიურ სიტუაციაში
ქართული ბრენდი KENE მომხმარებელს მაღალი ხარისხის ქალისა და მამაკაცის ვერცხლის აქსესუარებს სთავაზობს, რომელთა დიზაინიც სპეციალურად იქმნება.
KENE ეკა სუდაძემ და ნინი გოგსაძემ დააფუძნეს, მათი მიზანი მაღალი ხარისხის სამკაულების წარმოება და მომხმარებლისთვის ხელმისაწვდომ ფასად შეთავაზება იყო.
„ვფიქრობთ, ჩვენი ამოცანა წარმატებით განვახორციელეთ და მომხმარებელს ვთავაზობთ მათთვის ხელმისაწვდომ და შესაბამის მომსახურებას, რაც მთავარია, სპეციალურად შექმნილი დიზაინის სამკაულებს. ვგეგმავდით ახალი შოურუმის გახსნას, ველოდებით შესაბამის სიტუაციას და დროს განხორციელებისთვის. ამ ეტაპზე, ვთანამშრომლობთ ერთ-ერთ საწარმოსთან, რომელიც გვიმზადებს აქსესუარებს, თუმცა სამომავლო სურვილი გვაქვს საკუთარი საწარმო გავხსნათ. სამწუხაროდ, არსებობს რეგულაციები, რომლის თანახმადაც შეზღუდულია ძვირფასი ლითონის გაგზავნა საზღვარგარეთ, თუმცა ვმუშაობთ ამ საკითხზე და ვეძებთ გზებს, რომ შევძლოთ ჩვენი პროდუქციის ექსპორტზე გატანა, რადგან მოთხოვნა საკმაოდ დიდია სხვადასხვა ქვეყნიდან,“– აღნიშნავს "ბიზნესპარტნიორთან" ნინო გოგსაძე.
კომპანიაში ამბობენ, რომ პანდემიის პერიოდში მარკეტინგული სტრატეგიის დახვეწასა და ონლაინ გაყიდვების განვითარებაზე, მუშაობამ ბრედს გაყიდვების ზრდაში შეუწყო ხელი და ამ მხრივ საკმაოდ კარგი მოთხოვნა დაფიქსირდა.
„პრობლემები წარმოგვექმნა პანდემიის პერიოდის დასაწყისში, რადგან არსებული მდგომარეობის გამო, გარკვეული პერიოდის განმავლობაში შეჩერებული გვქონდა წარმოება. თუმცა ამ პერიოდში მოთხოვნა იმდენად გაიზარდა ონლაინ შეკვეთებზე, რომ გაყიდვების რაოდენობის შემცირების შემთხვევა არ გვქონია. ვზრუნავთ ბრენდის დიზაინსა და ვიზუალურ მხარეზე, თუ როგორ არის წარმოჩენილი პროდუქცია, რათა მომხმარებელმა მეტად აღიქვას და გაუჩნდეს შეძენის სურვილი. გაყიდვების სტიმულირებისთვის, ვიყენებთ სხვადასხვა გზას, ხშირად გვაქვს გათამაშების ტიპის რეკლამირება, მომხმარებლებს პერიოდულად ვთავაზობთ ფასდაკლებებს და ა.შ ამ ეტაპზე წარმატებით ვთანამშრომლობთ ტანსაცმლის ქართულ ბრენდთან- „პარაისოსთან“, ხშირად ვთავაზობთ მომხმარებელს საერთო პროექტებს,“ – ამბობს ეკა სუდაძე.
