ირაკლი ტყებუჩავა: ელექტროენერგიის საექსპორტო ფასი წელს 7.5-8 ცენტამდეა შემცირებული

2023 წლის იანვარ-ივლისში ელექტროენერგიის ექსპორტისგან მიღებული შემოსავალი წლიურად 24%-ით გაიზარდა.

7 თვეში ქვეყანამ ელექტროენერგიის ექსპორტისგან 80 მლნ დოლარზე მეტი შემოსავალი მიიღო. საქართველოდან ექსპორტირებული ელექტროენერგიის ძირითადი ნაწილი, მეტი, ტრადიციულად, წელსაც თურქეთში გავიდა, მცირე მოცულობით ექსპორტი განხორციელდა სომხეთშიც. 

როგორც სექტორის წარმომადგენლები ამბობენ, ბოლო სამი წლის განმავლობაში თურქეთში ელექტროებნერგიის ექსპორტი ძალიან მიმზიდველი გახდა.

როგორც „გროს ენერჯის“ ფინანსურმა დირექტორმა ირაკლი ტყებუჩავამ „ბიზნესპარტნიორთან“ საუბრისას განმარტა, ბოლო პერიოდში ელექტროენერგიის საექსპორტო ფასი 7.5-8 ცენტამდეა შემცირებული.

„ბოლო პოლიტიკურმა და ეკონომიკურმა პროცესებმა დიდი გავლენა იქონია თურქულ ვალუტაზე. ლირა დოლართან მიმართებაში გაუფასურდა და მსყიდველუნარიანობა დაკარგა, ვინაიდან ექსპორტი ხდება დოლარში, ელექტროენერგიის ფასი დაცემულია. თუმცა მოლოდინია, რომ მომავალში ისევ გაიზრდება საექსპორტო ღირებულება. თურქეთი დეფიციტური ქვეყანაა და ახრციელებს იმპორტს ჩვენი ქვეყნიდან. მათი ჰიდრორესურსიც შეზღუდულია. შესაბამისად, საქართველოდან ელექტროენერგიის ექსპორტი წარმატებით ხორციედებოდა წელსაც,“-აღნიშნა ირაკლი ტყებუჩავამ.

მისივე თქმით, ჭარბი ნალექის პირობებში ელექტროენერგიის ექსპორტი წელს აპრილიდან დაიწყო.

„იქიდან გამომდინარე, რომ ნალექი გვქონდა წელს, სისტემას ქონდა ჭარბი ელექტროენერია და შედარებით ადრე დაიწყო ექსპორტი.“-აღნიშნა ირაკლი ტყებუჩავამ.