ლაშა ხუციშვილი: ფასების შემცირება გაგრძელდება
ფინანსთა მინისტრი ლაშა ხუციშვილი ფიქრობს, რომ მომდევნო თვეების განმავლობაში ფასების შემცირების პროცესი გაგრძელდება.
"მიუხედავად იმისა, რომ კიდევ მაღალი ინფლაციაა საქართველოში, ბოლო 2 თვის განმავლობაში შემცირების ტრენდით ხასიათდება. მათ შორის გარკვეულ პროდუქტებთან მიმართებაში არის ცვლილება. ეს ბუნებრივია დამოკიდებულია პროდუქტებზე, რომელიც საერთაშორისო ბირჟებზე და საერთაშორისო ბაზრებზე ივაჭრება. FAO-ს ინდექსი ბოლო სამი თვის განმავლობაში მუდმივად შემცირებით ხასიათდება. ბოლო რამდენიმე კვირის განმავლობაში საერთაშორისო ბაზრებზე საწვავთან მიმართებაში შემცირება ფიქსირდება. გარკვეული დროის შემდეგ ბუნებრივია, ასახვას ჰპოვებს მათ შორის საქართველოში ფასების დონესთან მიმართებაში. ვფიქრობთ, ის მოცემულობა, რაც ფასების შემცირების მიმართულებით გვაქვს, უნდა გაგრძელდეს. თუმცა, ასევე ყველა კარგად ვხედავთ, რა რისკები არსებობს გეოპოლიტიკური მდგომარეობიდან გამომდინარე, შესაბამისად, ძალიან რთულია ზუსტი პროგნოზების გაკეთება", - აღნიშნა ლაშა ხუციშვილმა.
მისი თქმით, შემცირებას გააგრძელებს ინფლაციაც და 2023 წლის მეორე კვარტალში 3%-იან მიზნობრივ მაჩვენებელს დაუახლოვდება.
