Ford-ი ინდოეთში მანქანების წარმოებას წყვეტს

ამერიკული ავტომობილების გიგანტმა Ford-მა ინდოეთში მანქანების წარმოების შეწყვეტის შესახებ განაცხადა.  

Ford-ი 2022 წლის მეორე კვარტლისთვის ორივე ქარხანას დახურავს გუჯარათისა და ტამილნადუს შტატებში, მაგრამ გააგრძელებს მანქანის ძრავების ექსპორტს, ასევე ტექნიკურ მომსახურებას არსებული მომხმარებლებისთვის.

BBC-ის ინფორმაციით, კომპანიამ ბოლო ათწლეულის მანძილზე $2 მლრდ–ზე მეტის ზარალი განიცადა, ამასთან ახალ მანქანებზე მოთხოვნა შემცირდა.

ავტომობილების მწარმოებელმა, რომელმაც ხუთი მოდელი აწარმოა ადგილობრივი ბაზრისთვის, განაცხადა, რომ მომავალში Ford-ი გლობალურ სატრანსპორტო საშუალებებსა და ელექტრიფიცირებულ ჯიპებზე გადაინაცვლებს, - ნათქვამია განცხადებაში, თუმცა უცნობია დამზადდება თუ არა ისინი ინდოეთში.

ანგარიშების თანახმად, კომპანია 25 წელია აწარმოებს მანქანებს ინდოეთში და ფირმა მეცხრე ადგილზეა ქვეყნის უმსხვილესი ავტომწარმოებლების სიაში.

აღსანიშნავია, რომ 2017 წელს General Motors–მაც (GM) შეწყვიტა მანქანების დამზადება ინდოეთის ბაზრისთვის.

გასულ წელს კი, ჰარლი-დევიდსონმა შეწყვიტა წარმოება და მასიურად შეამცირა გაყიდვები მსოფლიოში ყველაზე დიდი მოტოციკლის ბაზარზე.