ბუნებრივი აირი 40 000-მდე აბონენტისთვის - გაზიფიცირების პროექტის ბიუჯეტი ₾135 მლნ-მდე გაიზარდა
3 წელში 40 000-მდე აბონენტი ბუნებრივი გაზით მომარაგდება. გაზიფიცირების საპროექტო და სამშენებლო სამუშაოებზე 135 272 350 ლარი დაიხარჯება.
ბუნებრივი გაზით მომარაგების მიზნით გაზიფიცირების საპროექტო და სამშენებლო სამუშაოების განხორციელებისთვის ბიუჯეტის გაზრდაზე განკარგულებას პრემიერმა ხელი უკვე მოაწერა.
ცვლილების მიხედვით, დამტკიცდა გაზიფიცირების 3-წლიანი გეგმა, რომლის ფარგლებშიც „საქართველოს გაზის ტრანსპორტირების კომპანიამ" 2022-2024 წლების განმავლობაში უნდა უზრუნველყოს ქვეყნის მასშტაბით 244 დასახლებულ პუნქტში არსებული 39 698 აბონენტის ბუნებრივი გაზით მომარაგების მიზნით გაზიფიცირების საპროექტო და სამშენებლო სამუშაოების განხორციელება.
განკარგულების თანახმად, საქართველოს ფინანსთა სამინისტრო და საქართველოს ეკონომიკისა და მდგრადი განვითარების სამინისტრო უზრუნველყოფენ შესაბამისი რესურსის მოძიებას და 2022-2024 წლებისთვის შესაბამისი ასიგნებების გათვალისწინებას. ასევე, გაზიფიცირების საპროექტო და სამშენებლო სამუშაოების დაფინანსება განხორციელდება 2023 წლის სახელმწიფო ბიუჯეტის ასიგნებებიდან.
