"კავკასნათის“ მიერ წარმოებული ბიო თხილი ექსპორტზე გერმანიაში, შვეიცარიასა და იტალიაში გადის
ასოციაცია „კავკასნათის“ მიერ წარმოებული ბიო თხილი ექსპორტზე ევროპის სამ ქვეყანაში გერმანიაში, შვეიცარიასა და იტალიაში გადის. როგორც ასოციაციის დამფუძნებელი „აგროპარტნიორთან“ საუბრისას განმარტავს, გასულ წელს 362 ტონა ბიო თხილი გავიტა ექსპორტზე ევროპაში.
„თხილის სექტორიდან ბიო სერთიფიკატს მხოლოდ „კავკასნათი“ ფლობს. 2021 წელს 136 ტონა ბიო თხილი ვაწარმოეთ. მოცულობები თანდათან გავზარდეთ, რადგან ჩვენი ასოციაციის სხვა წევრებმაც ეტაპობრივად მიიღეს ბიო სერთიფიკატი. 2022 წელს ჩვენს პლანტაციებში მოყვანილი 518 ტონა თხილიდან 362 ტონა იყო ბიო, რაც სრულად ექსპორტზე გავიდა. მოგეხსენებათ, ბიო სერთიფიკატის აღებას 36 თვიანი კონვერსიული პერიოდი სჭირდება. სამი სეზონი აუცილებელია იმისთვის რომ ნიადაგი გაიწმინდოს ყოველგვარი ქიმიკატებისგან.“-აღნიშნა თემურ ბოკუჩავამ.
მისივე განმარტებით, ბიო სერთიფიკატის მფლობელი თხილის გულის საექსპორტო ფასი, ერთ კილოგრამზე 2.5 ლარით მაღალია ჩვეულებრივ თხილთან შედარებით.
ცნობისთვის, ასოციაცია „კავკასნათი“ 8 კოოპერატივს და 700-ზე მეტ ფერმერს აერთიანებს.
