"მოურიე" - სტარტაპი ცხელი შოკოლადისთვის საჭირო ინგრედიენტებით
პანდემიურ მოცემულობაში ქართულ ბაზარზე კიდევ ერთი ახალი კომპანია გამოჩნდა. ეს არის სტარტაპი ქუთაისიდან - გემრიელი ცხელი შოკოლადისთვის საჭირო ნედლეულის ნარევით.
„მოურიე“ - ასე დავარქვით ჩვენს წამოწყებას, იდეა 3 თვის წინ გამიჩნდა, როდესაც მეგობრისთვის საჩუქრის შერჩევის პროცესში, მსგავსი პროდუქტი ქართულ ბაზარზე ვერ ვიპოვე. რამდენიმე ინტერნეტ მაღაზია და 2 კვირა დამჭირდა საჩუქრისთვის საბოლოო სახის მისაცემად. საჩუქრით გამოწვეულმა აღფრთოვანებამ და მომზადების პროცესში ექსპერიმენტებით აღმოჩენილმა ახალმა გემოებმა, მიგვიყვანა იდეამდე, შეგვექმნა გემრიელი და ხარისხიანი ცხელი შოკოლადის მიქსები. ჩავთვალეთ, რომ პანდემიით გამოწვეული ახალი რეალობის პირობებში, საკუთარი ხელით, 5 წუთში მომზადებული გემრიელი სასმელი, საინტერესო იქნებოდა მომხმარებლისთვის," - საუბრობს „ბიზნესპარტნიორთან“ „მოურიეს“ თანადამფუძნებელი მინდია ჩარქსელიანი.
გემოების დახვეწას და ბრენდირებას რამდენიმე თვე დასჭირდა, მზა პროდუქტი კი მომხარებელმა თებერვალში გაიცნო. კლასიკური, ცხარე, კარამელი, ესპრესო - ოთხი სახეობის ცხელი შოკოლადის ნარევს ახლო მომავალში კიდევ რამდენიმე უნდა დაემატოს. პროდუქცია ონლაინ იყიდება, შეთავაზებაშია საკურიერო მომსახურებაც მთელი საქართველოს მასშტაბით.
„სტარტისთვის გამოვიყენეთ საკუთარი ფინანსური რესურსი, დიდი ენთუზიაზმი და ბევრი სიყვარული. ვქმნით პროდუქტს, რომლის მომზადებაც დიდ დროს და ძალისხმევას არ საჭიროებს. ერთი ინგრედიენტის დამატებით, შესაძლებელია მარტივად მომზადდეს ცხელი შოკოლადი, რომელიც ამაღლებს განწყობას და ქმნის მყუდრო გარემოს. იმედი გვაქვს, მალე უფრო მეტი ადამიანი გაგვიცნობს და შეგვიყვარერებს," - აცხადებს მინდია ჩარქსელიანი.
გარდა ცალკეული სახეობებისა, კომპანია მომხარებელს გემოების კომბინაციით შექმნილ ორი ტიპის სასაჩუქრე ყუთსაც სთავაზობს.
