თბილისის ცენტრში Radisson-ის კიდევ ერთი სასტუმრო 2022 წელს გაიხსნება
თბილისში, სასტუმრო „თორის“ ნაცვლად, Radisson-ი 2022 წლის შემოდგომაზე გაიხსნება.
როგორც „ბიზნესპარტნიორს“ „ბლოკ ინვესტის“ აღმასრულებელმა დირექტორმა თორნიკე ჯანაშვილმა განუცხადა, ამჟამად ობიექტზე სამუშაოები აქტიურად მიმდინარეობს, უკვე დასრულებულია 0 სართულის მშენებლობა.
სასტუმროს საინვესტიციო მოცულობა 25 მლნ დოლარია. Radisson-ის სასტუმრო მოიცავს 200 ნომერს, კაფე-რესტორანს, საკონფერენციო დარბაზს, შეხვედრების ოთახებს.
„აქამდე დაგეგმილი იყო, რომ სასტუმროში Park Inn by Radisson-ის ბრენდი შემოსულიყო, თუმცა გადაწყვეტილება შეიცვალა. მათი სურვილიც იყო, რომ ამ ლოკაციაზე უფრო მაღალი კატეგორიის ბრენდი შემოსულიყო,“ - აცხადებს ჯანაშვილი.
საქართველოში Radisson-ის ბრენდის სამი სასტუმრო ოპერირებს, მათგან ორი - თბილისისა და ბათუმის სასტუმროები Radisson Blu-ს ბრენდით, წინანდალის სასტუმრო კი Radisson Collection-ის ბრენდით ოპერირებს.
